په کابل ښار کې د رحمن مینې طلایي ښارګوټي د ښاري وضعیت څارنه ترسره شوه
۱۴۴۷/۰۵/۰۳
د کور او ښار جوړولو وزارت د ښاري سرغړونو د مخنیوي ریاست محترم رئیس مولوي عبدالمنان حقاني وایي، د دې ریاست اړوند تخنیکي ټیم د کابل ښار د اتمې ناحیې اړوند د رحمن مینې طلایي ښارګوټي له تفصیلي پلان څخه د څارنې او ارزونې بهیر ترسره کړ.
په دې څارنه کې د ښاري سرغړونو ته د رسیدنې ریاست تخنیکي ټیمونو د ښارګوټي د سایټ پلان، عام المنفعه تاسیساتو، استوګنیزو او سوداګریزو ودانیو، سړکونو او ترانسپورتي شبکو، برېښنايي شبکو، اوبه رسونې او کانالیزېشن برخو وضعیت ارزونه تر سره شوه.
ښاغلي مولوي حقاني وویل، په دې ښار ګوټي کې ځینې سرغړونې شوې دي، په ځانګړي ډول د استوګنیزو نمرو پر ځای د استوګنیزو بلاکونو جوړېدل، د سړکونو او لارو د بندېدو پېښې، د شنو ساحو د پارکینګونو په توګه کارول، او د عامه تاسیساتو لکه کلینیک او وړکتون نشتون هغه سرغړونې دي چې د څارنې پر مهال تشخیص شوې دي.
محترم مولوي عبدالمنان حقاني ټینګار وکړ چې د ښاري سرغړونو مخنیوی د کور او ښار جوړولو وزارت له مهمو مسؤلیتونو څخه دی، او ټولو اړوندو ادارو ته لارښوونه شوې ده چې د تفصیلي پلانونو او ښاري اصولو د تطبیق په برخه کې جدي اقدام وکړي. نوموړي زیاته کړه چې د ښار جوړولو د اصولو رعایت د ښاري نظم، ښکلا او د خلکو د هوساینې لپاره بنسټیز اهمیت لري.
د کور او ښار جوړولو وزارت د ښاري سرغړونو د مخنیوي ریاست د هېواد په کچه د ښارونو د منظم پرمختګ، د تفصیلي پلانونو د تطبیق او د غیرقانوني جوړښتونو د مخنیوي لپاره منظم څارنې ترسره کوي.
