په کابل ښار کې د استوګنیزو پروژو د تطبیق په موخه د ځمکو پر انتقال خبرې وشوې
۱۴۴۷/۶/۲۳
د کور او ښار جوړولو وزارت محترم وزیر الحاج مولوي نجیب الله حیات حقاني، په خپل کاري دفتر کې د کرنې، اوبو لګولو او مالدارۍ وزارت د اراضۍ له عمومي رئیس محترم مولوي محمود مظلوم او مل پلاوي سره وکتل.
دواړو لوریو په دغه کتنه کې، په کابل ښار کې د استوګنیزو پروژو د تطبیق په موخه د ځمکو پر انتقال خبرې وکړې او د تخنیکي موضوعاتو د حل په موخه یې کمېټه و ګمارله.
دغه راز، په ناسته کې خبرې وشوې چې څنګه کېدای شي د مهاجرینو د ښارګوټو جوړولو په پار د ځمکو د انتقال چارې چټکې، اسانه او رالنډې شي.
د کرنې او مالدراۍ وزارت د اراضۍ محترم عمومي رئیس ډاډ ورکړ چې د اړتیا او غوښتنې په مهال به یې تخنیکي ټیمونه د کور او ښار جوړولو وزارت چارو ته لومړیتوب ورکړي او دغه پروسه به نه ځنډوي.
ګډه کمېټه به کار کوي، چې په لومړي ځل کابل ښار کې د شپږ په نښه شوو ځایونو د انتقال پروسه بشپړه کړي او ټولې تخنیکي او حقوقي ستونزې یې حل کړي.
د کور او ښار جوړولو وزارت محترم وزیر الحاج مولوي نجیب الله حیات حقاني ټینګار وکړ چې چارې دې یې چټکې شي او د رامنځته کېدونکو ستونزو د حل لپاره دې موضوع له مقام سره شریکه کېږي.
د کور او ښار جوړولو وزارت د معیاري مسکن او سرپناه د کمښت ستونزې د حل لپاره مټې رانغښتې دي او کار یې پیل کړی چې خلکو ته د سرپناه برابرولو زمینه برابره کړي.
