په کابل او یو شمېر ولایتونو کې د شته پروژو په اړه بحثونه وشول
۱۴۴۶/۰۶/۲۲
د کور او ښار جوړولو وزارت د محترم سرپرست وزیر الحاج شیخ حمدالله نعماني په مشرۍ د دغه وزارت رهبري ناسته وشوه او پر یو شمېر مهمو موضوعاتو خبرې وشوې.
په دغه ناسته کې، د یاد وزارت ښاري چارو محترم مرستیال شیخ مدارعلي کریمي بامیاني، د وزارت مالي او ادار محترم مرستیال الحاج محمد ارسلاح خروټي، د مسکنو ودانیزو چارو او د برنامو د پارختیا محترم مرستیال الحاج محمد اسماعیل فائز او نورو اړوندو محترمو رئیسانو او مسؤلینو برخه اخیستې وه.
په رهبري ناسته کې، د لوګر محمد اغه ولسوالۍ کې د صنعتي پارک پروژې، میدان وردګ ولایت کې د (۲۳) بلاکونو پروژې، د کابل په دهسبز او بګرامیو ولسوالیو کې د ورکشاپونو پروژې، میدان وردګ ولایت کوتل تخت سیمه کې د پارک پروژې، کابل کې د صنایع سبز صنعتي پروژې او ځینو نورو مهمو موضوعاتو په اده هر اړخیزې خبرې وشوې.
موخه دا وه، چې ژر تر ژره ځینې پروژې چې په کمو امکاناتو سرته رسېږي، بشپړې او ګټې اخیستنې ته وسپارل شي.
د کور او ښار جوړولو وزارت محترم سرپرست وزیر الحاج شیخ حمدالله نعماني، د یادو پروژو د برخلیک معلومولو او په تړاو یې د ځینو معلوماتو راټولولو لپاره استازي وټاکل چې په اړه به یې معلومات راټول او راتلونکې ناسته کې بیان کړي، تر څو یې په اړه وروستی تصمیم ونیول شي.
دغه وزارت هڅې کوي چې له ځمکو د اغېزمنې ګټې پورته کولو او نیمه کاره پروژو بشپړولو او دغه راز خلکو ته د کار کولو زمینې برابرولو برخه کې اغېزمن او چټک ګامونه پورته کړي.
