په پکتیکا ولایت کې د یو باب مسجد شریف له ودانیزو چارو څارنه وشوه
۱۴۴۴۷/۰۱/۰۵
د پکتیکا ولایت د کور او ښار جوړولو ریاست محترم رئیس مولوي محمد طاهر سیف الجهاد وایي، د دې ریاست اړوند تخنیکي ټيم د ښرنې ښار په مربوطاتو کې د کرنې ریاست د مسجد شریف له ودانیزو چارو څارنه وکړه.
ښاغلي مولوي سیف الجهاد وویل، په دې لیدنه کې څرګنده شوه چې د جومات د تهدابونو، رینګ بیمونو، کالمونو کانکریټ اچونې او د سنګ کارۍ برخې بشپړې شوې دي او د خشتکارۍ چارې د انجنیرانو د نقشې او هدایت مطابق په منظم ډول روانې دي.
د نوموړي په خبره، د نظارت پر مهال، د یادې پروژې په ځینو برخو کې تخنیکي نیمګړتیاوې ولیدل شوې، چې د ریاست استازي له لوري لازمې لارښوونې د پروژې مراقبت کوونکو انجنیرانو ته وشوې، تر څو پاتې چارې د انجنیري اصولو مطابق اصلاح او بشپړې شي.
د کور او ښار جوړولو ریاست ډاډ ورکوي چې د دې پروژې له پاتې چارو به دوامداره نظارت روان وي او د ترسره شویو کارونو کیفیت ته به ځانګړې پاملرنه کېږي.
