په پنجشیر ولایت کې د مستوفیت ادارې د کمپیوټر لابراتوار او ارشیف ودانۍ ګټې اخیستنې ته وسپارل شوه
۱۴۴۷/۰۹/۲۷
د کور او ښار جوړولو وزارت اړوند د پنجشیر ولایت د کور او ښار جوړولو ریاست له لوري د مستوفیت ادارې د کمپیوټر لابراتوار او ارشیف ودانۍ، چې طرحه، ډیزاین، تخنیکي څارنه او مراقبت یې د یاد ریاست له خوا ترسره شوي، بشپړه او رسماً ګټې اخیستنې ته وسپارل شوه.
یاده پروژه چې شاوخوا پنځه میلیونه افغانۍ لګښت پرې شوی، په معیاري او معاصر ډول جوړه شوې او په زغره والو دروازو، د اسنادو د ارشیف ځانګړو الماریو، امنیتي کامرو او عصري کمپیوټرونو او لپ ټاپونو سمبال ده.
د یادې ودانۍ په جوړېدو سره به د مستوفیت ادارې د اسنادو د ساتنې، تنظیم او ارشیف چارې لا منظمې شي او د عصري ټکنالوژۍ د کارونې لپاره به مناسب اداري چاپېریال رامنځته شي.
د مستوفیت ادارې د کمپیوټر لابراتوار او ارشیف ودانۍ جوړول د دولتي ادارو د اداري ظرفیت د پیاوړتیا او د مهمو مالي اسنادو د خوندي ساتنې په برخه کې مهم ګام بلل کېږي.
