په هرات کې د ښاري سرغړونو مخنیوی وشو
۱۴۴۷/۰۲/۰۴
د هرات ولایت د کور او ښار جوړولو ریاست محترم رئیس انجنیر عبدالله اکبري وایي، د دې ریاست د تخنیکي ټیم لخوا په انجیل او گذره ولسوالیو کې د ښاري سرغړونو د مخنیوي او ارزونې پراخې څارنې ترسره شوې.
ښاغلي انجنیر اکبري وویل، د څارنې پر مهال څرګنده شوه چې په یادو ولسوالیو کې ګڼ شمېر ودانیزې چارې د ښار جوړولو د اصولو او پلانونو پرته روانې دي.
د نوموړي په خبره، د دې ریاست اړوند تخنیکي ټیم موندلې چې ډېری ودانۍ د اړوندو ادارو له رسمي نقشو او قانوني مراحلو پرته په غیر معیاري ډول جوړېږي.
د کور او ښار جوړولو وزارت اړوند مسؤلین وایي، ټولې ودانیزې چارې باید د ښار جوړولو د اصولو، نقشې او قانوني اسنادو په رعایت ترسره شي.
