په هرات کې د جامع مسجد له رغنیزو چارو او د خواجه غلتان باستاني ځای له وضعیت څخه تخنیکي څارنه ترسره شوه
۱۴۴۷/۰۶/۰۵
د هرات ولایت د کور او ښار جوړولو ریاست محترم رئیس انجنیر عبدالله اکبري وایي چې د دې ریاست تخنیکي ټیم د جامع مسجد شریف د روانو رغنیزو چارو او د خواجه غلتان باستاني سیمې د وضعیت د ارزونې لپاره څارنه ترسره کړې ده.
ښاغلي انجنیر اکبري وویل، په جامع مسجد کې د ایوان شمالي د چت د خښت کارۍ، د جنوب لوېدیځ ټولو خونو د دیوالونو او چت د مرمت کارونه په جریان کې وو، او د کارګرانو له خوا د امنیتي سپارښتنو پلي کېدل تایید شول. همدارنګه د رواق ختیځې برخې د کاشي کارۍ مرمت ځینې برخې تړل شوې وې، همداراز د تخت منار د خښت کارۍ کار بشپړ شوی، د کار د کیفیت د لوړولو لپاره قراردادي شرکت ته تخنیکي سپارښتنې وشوې.
د نوموړي په خبره ، د خواجه غلتان باستاني په مزار کې د دیوالونو ځینې برخې، د فرش ساحې او د شمالي رواق دیوال تخریب شوي چې بیارغونې ته اړتیا لري،
په هرات کې د تاریخي او مذهبي آثارو د ساتنې چارې د کلتوري میراث د خوندیتوب مهمه برخه تشکیلوي، جامع مسجد او د خواجه غلتان مزار د ښار د ارزښتمنو تاریخی سیمو له ډلې دي چې منظمې څارنې او مرمت ته اړتیا لري.
