په نوي کابل ښار کې د ساختماني شرکتونو د ستونزو په اړه خبرې وشوې
۲۴/۱۲/۱۴۴۶
د کور او ښار جوړولو وزارت سرپرست وزیر محترم الحاج شیخ حمدالله نعماني په خپل کاري دفتر کې د ښاري چارو له محترم مرستیال شیخ مدارعلي کریمي بامیاني سره یو ځای د "اوکسینا آریانا" ساختماني او سړک جوړولو شرکت له رئیس، انجنیر محمد ایوب سروري او د نوی کابل ښار د پروژې د یو شمېر د ځمکو له مالکینوسره ولیدل.
په دې ناسته کې، انجنیر سروري وویل چې دوی له زون پایتخت سره د پخوانۍ ادارې په موده کې د "نوی کابل ښار" لپاره د لوړمنزلو استوګنیزو ودانیو د جوړولو تړون لاسلیک کړی، خو اوس د یوه بل ساختماني شرکت سره د ځمکې پر سر ستونزې لري.
همداراز، یو تن د ځمکې له مالکینو هم شکایت وکړ چې ځینې شرکتونه، چې د دوی پر ځمکه د استوګنیزو کورونو جوړولو تړون لري، خپلو ژمنو ته ژمن نه دي پاتې شوي.
سرپرست وزیر، محترم نعماني، وویل چې ډېر ژر به دواړه ښکېل شرکتونه اوکسینا آریانا او مقابل لوری وزارت ته راوغوښتل شي، تر څو د ستونزو د لا غور، ارزونې او حل زمینه برابره شي.
هغه د ځمکې مالکینو ته وویل، د حقوقي ستونزو د حل لپاره اړوند ادارو ته مراجعه وکړئ، څو دا مسئلې قانوني او عادلانه حل شي.
