په ننګرهار ولایت کې د ښاري تخلفاتو مخنیوی وشو
۱۴۴۷/۲/۲۶
د کور او ښار جوړولو وزارت، له ښاري تخلفاتو د مخنیوي ریاست محترم رئیس مولوي عبدالمنان حقاني وایي، د ریاست اړوند تخنیکي ټیم یې د ننګرهار په مرکز جلال اباد ښار څلورمه ناحیه کې د ښاري تخلفاتو مخنیوی وکړ.
ښاغلی مولوي حقاني وایي، مسلکي او تخنیکي ټیم یې د دغه ولایت د کور او ښار جوړولو ریاست د محترم رئیس حافظ مولوي محمد نبي سعیدي په لارښوونه او همکارۍ د جلال اباد ښار څلورمه ناحیه کې د ښاري تخلفاتو د مخنیوي په موخه د څار په مهال د یو خپلسري کار مخنیوی وکړ .
نوموړی وایي، د څلورمې ناحيې اړوند یو کس غوښتل چې د ابادۍ چارې مخته يوسي، خو په خبره یې ياد د ابادۍ ځاى د پښتني بانک ملکيت و، چې په تفصيلې پلان کې لوړ پوړیز ښودل شوى، اما یاد کس نه کوم قرار داد لیک درلود، نه یې د ښاروالۍ له خوا کومه ويزه شوې نقشه درلوده او نه یې هم له ناحيې د کار اجازه اخیستې وه.
ښاغلی حقاني وایي، په همدې سبب یې د ښاري تخلفاتو ټيم لخوا پرې چارې بندې شوې او ورته لارښوونه وشوه، چې قانوني پړاونه سرته ورسوي.
د معلوماتو له مخې، د پلانونو د عملي کېدا او د اهميت په اړه هم عامه پوهاوى ورکړل شو.
د کور او ښار جوړولو وزارت له ټولو هېوادوالو غواړي چې د ابادۍ چارو په مهال د دغه وزارت پلانونه په پام کې ونیسي او د عملي کېدا لپاره یې لاس په کار شي، ترڅو د ښاري بې نظمیو مخنیوی وشي او د ښار ښکلا ساتل شوې وي.
