په میدان وردګ کې د سردار محمد داود خان او توسعوي ښارګوټو څارنه ترسره شوه
۱۴۴۷/۰۳/۲۵
د میدان وردګ ولایت د کور او ښار جوړولو ریاست محترم رئیس مولوي عبدالقیوم سیفالعمر وایي چې د یاد ریاست اړوند تخنیکي ټیم د سردار محمد داود خان ښارګوټي او توسعوي ښارګوټي د څارنې په موخه لېدنه وکړه.
ښاغلي مولوي سیف العمر وویل، د څارنې پر مهال څرګنده شوه چې په دواړو ښارګوټو کې کومه نوې سرغړونه نه ده رامنځته شوې او ټولې موجودې سرغړونې د پخواني وخت دي. همدارنګه، هغه ودانیز کارونه چې روان وو د تفصیلي پلان سره سم پرمخ تللي او کوم تخنیکي ستونزه پکې نه ده لیدل شوې.
مولوي عبدالقیوم سیفالعمر زیاته کړه چې د کور او ښار جوړولو ریاست تخنیکي ټیم به د ښارګوټو له پروژو په دوامداره ډول څارنه کوي تر څو ټول کارونه د پلان او معیاري اصولو سره سم پرمخ ولاړ شي.
د کور او ښار جوړولو وزارت د ښارګوټو د معیاري کولو او د ښاري سرغړونو د مخنیوي لپاره په ټول هېواد کې د څارنې او ارزونې پروګرامونه پر مخ وړي او دغه ډول څارنې د دې لپاره ترسره کېږي چې غیرپلاني ودانیزې چارې کنټرول شي، د خلکو لپاره معیاري استوګنځایونه برابر شي او د ښاري خدمتونو وړاندې کولو کې شفافیت رامنځته شي.
