په میدان وردګ ولایت کې پر راستانه شوو مهاجرو د ځمکو د وېش لړۍ په دوام نورو مهاجرو کورنیو ته هم نمرې ورکړل شوې
۱۴۴۷/۹/۱۹
په میدان وردګ ولایت کې د کور او ښار جوړولو محترم ریاست له لوري د راستنو شوو مهاجرینو د بیا مېشتېدو په موخه د ځمکو د وېش لړۍ ترسره شوه.
د کور او ښار جوړولو وزارت د اړوند ریاست له لوري د ولایتي کمېټې د استازو په شتون کې راستنو شوو مهاجرو کورنیو ته د استوګنې نمرې ووېشل شوې.
دا پروسه د شفافې قرعهکشۍ له لارې ترسره شوه او په دغه پړاو کې اتلس (۱۸) راستنو شوو کورنیو ته د استوګنې نمرې ورکړل شوې.
د نمرو وېش د دې لپاره ترسره شو چې راستنې شوې کورنۍ وکولای شي په منظم ډول د استوګنې ځایونه ترلاسه کړي او د دوامدار ژوند لپاره ورته مناسب شرایط برابر شي.
دا پروګرام د هغو افغان مهاجرو د ملاتړ برخه ده چې له نورو هېوادونو څخه بېرته هېواد ته راستانېږي او په کور دننه ورته هڅې روانې دي، چې راستنېدونکو ته د سرپناه، ځمکې او بنسټیزو خدماتو برابرولو له لارې د بیا مېشتېدو زمینه برابره شي.
د نمرو وېش به په راتلونکو پړاوونو کې هم دوام ولري، څو نورې راستنې شوې کورنۍ هم د استوګنې له دې فرصت څخه برخمنې شي.
