په لوګر ولایت کې د مهاجرینو ښارګوټي لپاره د ۱۰۲۸ جریبه ځمکې توپوګرافي سروې ترسره شوه
۱۴۴۷/۰۶/۲۳
د کور او ښار جوړولو وزارت د سروې او جي ای ایس ریاست مسؤلین وایي چې د دې ریاست تخنیکي ټیم د لوګر ولایت مرکز کې د ۱۰۲۸ جریبه ځمکې توپوګرافي سروې ترسره کړې ده.
یاده سروې د دې لپاره ترسره شوې چې په سیمه کې د مهاجرینو د ښارګوټي د ایجاد لپاره دقیق تخنیکي معلومات تر لاسه شي او د راتلونکي پلان جوړونې بنسټ په بشپړ ډول معیاري شي.
د سروې ټیم د ساحې جغرافیایي ځانګړتیاوې، ارتفاعي نقاط، طبیعي بدلونونه او فزیکي حدود په دقیقه توګه ثبت کړي دي، ترڅو د ښارګوټي د تفصیلي پلان لپاره دقیق معلومات برابر شي.
مسؤولین زیاتوي چې دا سروې د سیمې د ښاري پراختیا او د بې ځایه شویو او راستانه شویو مهاجرینو د اساسي اړتیاوو د حل په برخه کې مهم ګام ګڼل کېږي.
