په لوګر ولایت کې د مهاجرینو د ښارګوټي د استوګنیزو نمرو د خط اچولو چارې روانې دي
۱۴۴۷/۱۰/۲۷
د کور او ښار جوړولو وزارت، راستنېدونکو مهاجرینو ته د استوګنې د زمینې برابرولو په موخه د هېواد په بېلابېلو ولایتونو کې د ښارګوټو د جوړېدو او د ځمکو د وېش لړۍ روانه کړې ده.
په همدې لړ کې لوګر ولایت کې د راستنېدونکو مهاجرینو د ښارګوټي د استوګنیزو نمرو د خط اچولو چارې په منظم ډول روانې دي.
د کور او ښار جوړولو وزارت د محترم مقام د لارښوونې پر اساس، د لوګر ولایت د کور او ښار جوړولو ریاست تخنیکي او انجینري ټیمونو له لوري، د منظور شوي پلان سره سم د یاد ښارګوټي د نمرو د خط اچولو او د نقشې د تطبیق چارې پیل او په منظم ډول دوام لري.
یاد ښارګوټی د لوګر ولایت مرکز پلعلم په مربوطاتو کې موقعیت لري، چې په شاوخوا «۸۲۵» جریبه امارتي ځمکه کې طرحه او ترتیب شوی دی.
په دې ښارګوټي کې ټولې «۱۰۲۶» استوګنیزې نمرې شاملې دي، چې د عالیقدر امیرالمؤمنین حفظه الله تعالی د ځانګړي هدایت پر اساس به هرې راستنې شوې مهاجرې کورنۍ ته «۵» بسوې ځمکه ورکړل شي.
د نمرو د وېش بهیر به د مرکزي کمېسیون او د سیمه ییزو مسؤلینو تر مستقیمې څارنې لاندې په شفاف ډول ترسره شي، څو د عادلانه وېش زمینه برابره شي.
د یاد ښارګوټي په بشپړېدو سره به سلګونه راستنې شوې کورنۍ دایمي سرپناه لپاره استوګنیزې نمرې ترلاسه کړي.
