په زابل ولایت کې د مهاجرینو ښارګوټي د تفصیلي پلان تطبیق پيل شو
۱۴۴۷/۶/۱
د کور او ښار جوړولو وزارت د سروې او جي ای ایس ریاست محترم رئیس حافظ انجنیر محمد یوسف لطیف وایي، د ریاست اړوند تخنیکي ټیم یې د زابل ولایت په مرکز قلات کې د مهاجرینو د ښارګوټي د تفصیلي پلان د تطبیق په موخه د کرښو وېستل او عملي چارې پیل کړې.
ښاغلی حافظ لطیف وایي، دغه ښارګوټی چې د 4321 جریبه ځمکې په مساحت کې طرحه شوی، د اړمنو کورنیو د اساسي اړتیاوو د پوره کولو په موخه جوړېږي.
نوموړی وایي، په دې ښارګوټي کې ټولې 3000 استوګنیزې نمرې ترتیب شوې دي چې د شاوخوا 30000 کسانو د استوګنې وړتیا لري.
د معلوماتو له مخې، د ښارګوټي پلان د اساسي خدمتونو، بنسټیزو تأسیساتو او د ژوند ټولنیزو اړتیاوو ته په پام سره ترتیب شوی، څو د بېرته راستانه شویو اړمنو کورنیو لپاره یو منظم، معیاري او د دوام وړ استوګنځای رامنځته شي.
د یاد ښارګوټي د عملي کارونو پيل د کور او ښار جوړولو وزارت د هغو پراخو هڅو یوه برخه ده چې موخه یې د اړمنو مهاجرو کورنیو د ژوند باثباته کول او د هغوی لپاره د مناسب استوګن ځای برابرول دي.
