په زابل ولایت کې د قلات ښاروالۍ د یوه باب مارکېټ له ودانیزو چارو څارنه وشوه
۱۴۴۷/۳/۲۱
د زابل ولایت د کور او ښار جوړولو ریاست محترم رئیس ملاداد ګل مسلم وایي، د دې ریاست د تخنیکي او مسلکي ټیم له لوري د قلات ښاروالۍ اړوند د مارکېټ له ودانیزو چارو څخه څارنه وشوه.
ښاغلي ملا مسلم وویل، د څارنې پر مهال په مارکېټ کې په ځینو برخو کې د سیخ بندۍ او په ځینو برخو کې د قالب بندۍ چارې په جریان کې وې.
د نوموړي په خبره، تخنیکي ټیم د قراردادي شرکت مسئولینو ته سپارښتنه وکړه چې د مارکېټ ټول کارونه باید د نقشې، قرارداد او کاري پلان سره سم، په ټاکلي وخت کې پرمخ یوسي.
همدارنګه، قراردادي شرکت ته هدایت وشو څو د کانکریټ اچولو لپاره نوي او په کافي اندازه قالبونه برابر کړي او د کارونو د لا ګړندي کېدو هڅه وکړي.
یاد مارکېټ د قلات ښاروالۍ له مهمو پروژو څخه دی، چې موخه یې د سوداګرو لپاره د معیاري ځایونو برابرول او د ښار د اقتصادي او ښاري پرمختګ پیاوړتیا ده.
