په تورخم ښاروالۍ کې د مامورینو د استوګنیز تعمیر او احاطې پروژې څارنه ترسره شوه
۱۴۴۷/۰۳/۲۴
د ننګرهار ولایت د کور او ښار جوړولو ریاست محترم رئیس حافظ مولوي محمد نبي سعیدي وایي، چې د یاد ریاست اړوند تخنیکي ټیم د تورخم ښاروالۍ په ډکي ساحه کې د مامورینو د استوګنیز تعمیر او احاطې له پروژې څارنه وکړه.
ښاغلي مولوي سعیدي وویل، د نظارت ټیم د تخنیکي انجینرانو په حضور کې څرګنده کړه چې د پروژې د دوهم منزل د جوړولو او احاطې ۲۰ سلنه چارې تر دې دمه بشپړې شوې دي او اوس مهال ساختماني کارونه په منظم ډول جریان لري.
مولوي محمد نبي سعیدي زیاته کړه چې د تخنیکي ټیم له خوا د قراردادي شرکت مسؤلینو ته د کیفیت د لوړوالي او د کارونو د سمون په موخه لازمې سپارښتنې او لارښوونې ورکړل شوې دي، تر څو پروژه په ټاکلي وخت او ښه کیفیت سره بشپړه شي.
د یادونې ده، د کور او ښار جوړولو وزارت په بېلابېلو ولایتونو کې د دولتي تاسیساتو او استوګنیزو پروژو د معیاري جوړېدو لپاره د څارنې او ارزونې دوامداره پروګرامونه پرمخ وړي، دغه څارنې د دې لپاره ترسره کېږي چې پروژې د تخنیکي نقشو او معیاري اصولو سره سم پر وخت بشپړې شي او د دولتي مامورینو لپاره د کار او استوګنې اسانتیاوې برابرې کړي.
