په بلخ ولایت کې د مهاجرینو د ښارګوټي له ودانیزو چارو څارنه وشوه
۱۴۴۷/۰۶/۰۵
د بلخ ولایت د کور او ښار جوړولو ریاست محترم رئیس مولوي عینالدین حامد وایي چې د دې ریاست تخنیکي ټیم د مهاجرینو د ښارګوټي د ودانیزو چارو بهیر په منظم او چټک ډول تعقیبوي، د نوموړي په وینا، په یاد ښارګوټي کې د خط اچونې پروسه به په نږدې ورځو کې بشپړه شي، په داسې حال کې چې د بلاکبندۍ چارې تر ۴۵ سلنې پورې مخته تللې دي او د سرک جوړولو کارونه هم په چټکۍ روان دي.
ښاغلي مولوي حامد وویل، د ثبت شویو مهاجرینو د ویش پروسه د کور او ښار جوړولو ریاست د تخنیکي ټیم له لوري روانه ده، څو مستحق کورنیو ته د استوګنې مناسب ځایونه پر وخت ورسول شي.
د بلخ مهاجرینو ښارګوټی د بېرته راستنو شوو کورنیو د اسکان ستونزې د حل لپاره طرحه شوی، د دې پروژې د رغنیزو چارو چټکتیا د ولایت د ښاري پرمختګ او د مهاجرو د هوساینې لپاره مهم ګام بلل کېږي.
