په بامیان کې د مسجد شریف د ودانیزې پروژې ۶۰ سلنه چارې بشپړې شوې دي
۱۴۴۷/۰۳/۲۸
د بامیان ولایت د کور او ښار جوړولو ریاست محترم رئیس انجنیر امان الله امان وایي چې د دې ریاست اړوند تخنیکي ټیم د بامیان ولایت د هوايي ډګر اړوند د مسجد شریف د ودانیزې پروژې له کارونو څارنه او مراقبت وکړ.
ښاغلي انجنیر امان وویل، د څارنې پر مهال څرګنده شوه چې یاده پروژه شاوخوا ۶۰ سلنه فزیکي پرمختګ لري او اوس هم کارونه په منظم ډول روان دي، څارونکي ټيم د قراردادي شرکت مسؤلینو ته لازمې لارښوونې وکړې، څو د پروژې چارې د نقشې او تخنیکي معیارونو مطابق پرمخ یوسي.
د کور او ښار جوړولو وزارت په هېواد کې د دیني، ټولنیزو او عام المنفعه تاسیساتو د جوړولو او سمبالولو لپاره پراخې هڅې کوي، چې د بامیان ولایت د هوايي ډګر اړوند د مسجد شریف پروژه د همدغو هڅو یوه برخه ده چې د بشپړېدو وروسته به د خلکو د اړتیاوو په پوره کولو کې مهم رول ولوبوي.
