په اړوندو برخو کې لا زیاته همکاري د یوې ادارې د پرمختګ لامل ګرځي چې باید پر وخت ترسره شي
۱۴۴۷/۹/۹
د کور او ښار جوړولو وزارت د محترم مالي او اداري مرستیال مولوي محمد رباني ناصح په مشرۍ غونډه وشوه، چې په کې د ۱۴۰۳ مالي کال په تړاو د فرامینو او احکامو پر تطبیق د څار محترم عمومي ریاست اړوند راپور پر مسودې بحث وشو.
په دغه غونډه کې د داخلي پلټنې، مالي، اداري، د کارکوونکو چارو، تدارکاتو، عوایدو، املاک او اسکان ریاستونو او د دې وزارت اړوند د مقروضیتونو کمېټې رئیسانو او استازو ونډه اخیستې وه او پر یاده موضوع یې هر اړخیز بحثونه وکړل.
په پیل کې د اړوندو ریاستونو استازو او مسؤلینو هر یوه په خپل وار د موضوع اړوند او د خپلو ریاستونو د فعالیتونو او پر وخت کړنو په اړه بشپړ معلومات وړاندې کړل او د خپلو مکلفیتونو، مسؤلیتونو او دندو پر سم او پر وخت ترسره کولو یې ټینګار وکړ.
په دې غونډه کې، ځینو رئیسانو د خپلو اړوندو برخو د ستونزو او ننګونو یادونه هم وکړه او د لا زیاتې همکارۍ غوښتنه یې وکړه.
ورپسې، ښاغلي مالي او اداري مرستیال مولوي محمد رباني ناصح، د دندو او فعالیتونو پر وخت ترسره کول مهم وبلل او اړوندو ریاستونو ته یې سپارښتنه وکړه چې د یادې موضوع په تړاو خپلې کړنې ژر تر ژره بشپړې کړي.
نوموړي همداراز د ټولو ریاستونو ترمنځ پر همغږۍ او همکارۍ ټینګار وکړ او زیاته یې کړه چې د اړتیا په صورت کې دې جدي او هر اړخیزه همکاري ترسره شي.
