پروان ولايت کې د ترکمنستان وارداتي برېښنا په مسير کې د جايدادونو د مالکيت حق د تثبيت او ارزښت ټاکنې چارې بشپړې شوې
د ښار جوړولو او ځمکو وزارت د ټولګټو پروژو د چارو انسجام ریاست رپوټ پر اساس، په پروان ولايت کې د برېښنا د پايو د نصب ۱۷۵ محلونو د مالکيت حق د تثبيت او ارزښت ټاکنې چارې بشپړې شوې.
همدارنګه د ۱۷۵ پايو د نصب محلونو له ډلې ۱۵۲ يې دولتي او ۲۳ يې د شخصي خلکو ملکيتونه تثبيت شوي دي. د دې پايو مسير د پروان ولايت له سالنګ ولسوالۍ څخه د خلازايي قريې پورې رسيږي.
ښار جوړولو او ځمکو وزارت په پروان ولايت کې د پايو د نصب لپاره د مالکيت حق د تثبيت تر څنګ؛ د يادې پروژې د دايمي سړکونو په مسير کې د مالکيت حق د تثبيت چارې هم پيل کړي دي. د دې پروژې په بشپړېدو سره به په کابل کې د برېښنا پرچاوۍ سربېره په لوګر، ميدان وردګ، غزني، کندهار، ننګرهار او کونړ ولايتونه هم له برېښنا برخمن شي.
