نوي کابل ښار کې د عملي چارو د پیل لپاره د پلانونو پر څرنګوالي او اغېزو خبرې وشوې
۱۴۴۷/۲/۲۳
د کور او ښار جوړولو وزارت د محترم وزیر الحاج مولوي نجیب الله حیات حقاني په مشرۍ او د دغه وزارت د ښاري چارو محترم مرستیال شیخ مدارعلي کریمي بامیاني، محترم مالي او اداري مرستیال الحاج محمد ارسلاح خروټي او د دغه وزارت د مسکن، ودانیزو چارو او د برنامو د پراختیا محترم مرستیال مولوي ګل زرین صابر او دغه راز د وزارت اړوندو رئیسانو او امرینو په حضور کې ناسته وشوه.
په دغه ناسته کې، په نوي کابل ښار کې د ماسټر پلان، جوړښتي یا ساختاري پلان او تفصیلي پلانونو په اړه خبرې وشوې.
په دې تړاو ګمارل شوي هیئت خپل راپور او موندنې په جلسه کې بیان کړې او د چارو د لا ښه والي په موخه یې د لارښوونې غوښتنه وکړه.
د کور او ښار جوړولو وزارت محترم وزیر الحاج مولوي نجیب الله حیات حقاني وویل، په دغه ښار کې د شته پلانونو هر اړخیزه ارزونه دې وشي، د تطبیق په ساحه کې د رامنځته کېدونکو پړاونو او د ستونزو توپیرونه دې وشي او د حل او عملي کېدا لپاره دې مسؤلانه وړاندیزونه وشي.
په غونډه کې ګډونوالو هر یو خپل دلایل او تخنیکي نظریات وړاندې کړل او د یادې سترې پروژې د چارو د لا اغېزمنتیا په موخه یې وړاندیزونه وکړل.
ښاغلي وزیر مولوي نجیب الله حیات حقاني وویل، تر تخنیکي هر اړخیزې څېړنې وروسته به د عملي اقداماتو لپاره لاس په کار شي.
نوموړي د نوي کابل ښار سترې پروژې اهمیت او اړتیا ته په کتو ټینګار وکړ، چې هر لوری دې ژر تر ژره خپلې چارې سرته ورسوي او د وروستي تصمیم په موخه دې یې بلې غونډه کې بیان کړي.
د کور او ښار جوړولو وزارت هڅې پیل کړي، چې په نوي کابل ښار کې د ابادۍ او پرمختګ چارې لا چټکې، اغېزمنې او با کیفیته کړي.
