ننګرهار کې د سید اسحاق په نوم د ښارګوټي له وضعیت لیدنه او ارزونه وشوه
۱۴۴۷/۰۶/۰۶
د ا.ا.ا د ریاسة الوزرا محترم عالي مقام د حکم پر اساس د کور او ښار جوړولو د محترم وزیر الحاج مولوي نجیب الله حیات حقاني په مشرۍ ګډ هیئت چې په ترکیب کې یې د مخابراتو او معلوماتي تکنالوجۍ وزیر الحاج مولوي حمدالله نعماني، د صنعت او سوداګرۍ وزارت محترم مرستیال الحاج مولوي احمدالله زاهد، د اراضي محترم عمومي رئیس مولوی محمود مظلوم، د مالیې وزارت د ګمرکاتو محترم مرستیال مفتي عبدالمتین سعید، د ننگرهار محترم والي او د ننګرهار د کور او ښار جوړولو محترم رئیس مولوي نبي الله سعیدي شامل وو، د ننګرهار ولایت د سید اسحاق ګیلاني له ښارګوټي څخه چې ځمکه یې امارتي تثبیت شوې، لیدنه وکړه.
یاد ښارګوټی څه موده وړاندې د ځمکو د غصب مخنیوي کمیسیون له خوا د امارتي ملکیت په توګه تثبیت شو.
د ګډ هیئت د لیدنې موخه د تثبیت شوو ساحو وضعیت ارزول، د ښارګوټي د حقوقي حالت کتل او د راتلونکو پرمختیایي امکاناتو د همغږۍ څېړل وو.
د کور او ښار جوړولو وزارت د محترم وزیر الحاج مولوي نجیب الله حیات حقاني په مشرۍ ګډ هېئت د سیمې تخنیکي حدود، تثبیت شوي قطعات، اداري اسناد او د ښارګوټي موجوده وضعیت و ارزاوه.
ګډ پلاوي ټینګار وکړ چې امارتي تثبیت شوې ځمکې به د قانون، ملي ګټو او د شفافو اصولو پر بنسټ خوندي او اداره کېږي، او اړوندې ادارې به د هر ډول راتلونکو پرمختیایي چارو د تطبیق لپاره په همغږۍ کار کوي.
