میدان وردګ ولایت کې د اته شپېته میلیون افغانیو په ارزښت د پروژې چارې پیل شوې
۱۴۴۶/۰۷/۰۷
د کور او ښار جوړولو وزارت په میدان وردګ ولایت کې د اته شپېته (۶۸) میلیون افغانۍ په ارزښت د یوې پروژې د عملي چارو پرانسته وکړه.
د کور او ښار جوړولو وزارت محترم سرپرست وزیر الحاج شیخ حمدالله نعماني د یادې پروژې د پرانستې په مراسمو کې وویل، د دغې پروژې په پلي کېدا سره به شاوخوا زر (۱۰۰۰) کسانو ته په مستقیم او غیر مستقیمه توګه د کار کولو زمینه برابره شي.
ښاغلي نعماني وویل، د دغې پروژې فرمایش ورکوونکی د ترانسپورت او هوایي چلند محترم وزارت دی، چې د کور او ښار جوړولو وزارت یې پلان، طرحه، ډیزاین او نقشه جوړه، تطبیق او د تطبیق له چارو نظارت کوي.
نوموړي وویل، دغه پروژه د ترانسپورتي ترمینل دی، چې د سویلي ولایتونو د خلکو لپاره به زیات شمېر اسانتیاوې برابرې شي او د دوه سوه (۲۰۰) موټر د تم کېدو ظرفیت به ولري.
دغه پروژه به په نهه (۹) میاشتو کې بشپړه شي، چې ورسره به د عوایدو زیاتېدو ترڅنګ خلکو ته د کار کولو زمینه برابره شي، ولایت به ورسره پرمختګ وکړي، د وړو کاروبارونه زمینه به برابره شي او په ټوله کې به د فقر او غربت کچه یو څه راکمه شي.
د کور او ښار جوړولو وزارت هڅې پیل کړي چې په هېواد کې یو شمېر داسې پروژې په کار واچوي چې له مخې یې خلکو ته د کار کولو زمینې برابرې شي.
