له کابل تللي هیئت د شهرنو ښارګوټي د ودانیزو چارو د څرنګوالي په اړه د ساختماني شرکت له مسؤلینو سره وکتل
۱۴۴۶/۰۲/۲۲
د کور او ښار جوړولو وزارت د محترم سرپرست وزیر الحاج شیخ حمدالله نعماني په مشرۍ بلخ ولایت ته تللي هیئت، چې په ترکیب کې یې محترم مشاور شیخ شېراغا رشیدي، د امیرالمؤمنین حفظه الله د احکامو او فرامینو د تعقیب او څار لوی ریاست د اداري فساد پر وړاندې د مبارزې عمومي رئیس محترم مفتي صفي الرحمن خالد، د کرنې، مالدارۍ او اوبو لګولو وزارت د مجدد اسکان د استملاک او قبالو محترم عمومي رئیس مولوي عبدالعلي عمري او د کورنیو چارو وزارت د اداري واحدونو محترم رئیس مولوي محمد اسلم شریفي شامل دي، په بلخ ولایت کې یې د شهرنو په نوم د ښارګوټي د ودانیزو چارو د څرنګوالي او د ځمکو په تړاو د حقوقي ستونزو د حل په موخه د ساختماني شرکت له مسؤلینو سره وکتل او دغه راز یې د معترضو خلکو د قبالو لیدنه او څېړنه هم وکړه.
د شهرنو ښارګوټي ساختماني شرکت له مسؤلینو سره په ښارګوټي کې د شاملو ځمکو او د ودانیزو چارو د پرمختګ پر څرنګوالي خبرې وشوې، د معتبر حقوقي تړون، تګلارو او تضمین په اړه ترې بېلا بېلې پوښتنې وشوې.
په ورته وخت کې، معترضو خلکو د خپلو راوړو قبالو په اړه دلایل او نظریات وړاندې کړل او د یو شمېر نورو هغه قبالو په اړه یې هم یادونه وکړه، چې په خبره یې ځینو مافیایي کړیو جعلي جوړې کړي او په ساحه کې د تطبیق وړ نه دي.
په ټوله کې، د یاد ښارګوټي د حقوقي او نورو ستونزو د حل په تړاو هر اړخیزې پلټنې وشوې، نظریات تبادله شول، اسناد او قبالې وکتل شوې، فزیکي وضعیت له نږدې وکتل شو او له بېلا بېلو امارتي ادارو اسناد او سوابق وغوښتل شول، چې یاد ګمارل شوی هیئت به بشپړ راپور له ځان سره کابل ته یوسي او د وروستي تصمیم په موخه به یې د ریاسة الوزرا محترم عالي مقام ته وړاندې کړي.
