له سختو شرایطو راوتلي او با تجربه اشخاص، د اسلامي او ملي ګټو پر بنسټ پرېکړه او کار کوي
۱۴۴۷/۹/۱
د کور او ښار جوړولو وزارت، د محترم وزیر الحاج مولوي نجیب الله حیات حقاني په مشرۍ او د دغه وزارت د مسکن، ودانیزو چارو او د برنامو د پراختیا محترم مرستیال مولوي ګل زرین صابر، د کور او ښار جوړولو وزارت د ښاري چارو محترم مرستیال شیخ مدارعلي کریمي بامیاني او دغه راز، د وزارت محترم مالي او اداري مرستیال مولوي محمد رباني ناصح په ګډون، د وزارت په کچه رهبري ناسته وشوه.
په دغه ناسته کې، چې په کې د وزارت اړوندو محترمو رئیسانو او چارسمبالو هم برخه اخیستې وه، پر څو مهمو موضوعاتو خبرې اترې وشوې.
ښاغلي وزیر الحاج مولوي نجیب الله حیات حقاني وویل، افغانستان کې اسلامي شرعي نظام حاکم دی، چې مسؤلین یې له سختو شرایطو راوتلي، تجربې لري او د اسلامي او ملي ګټو پر بنسټ پرېکړې او عمل کوي.
ښاغلي وزیر وویل، د ولس په چارو کې ورته خنډ او ځنډ د منلو نه دی او هغه کسان چې وظیفوي غفلت کوي، د قانوني چلند سره به مخامخ شي.
نوموړي د وزارت ټولو کار کوونکو ته ډاډ ورکړ، چې ولس، هېواد او نظام؛ وړ، ریښتیني او ژمن کسانو ته اړتیا لري او د اړتیا او اهلیت له مخې به کار ورکول کېږي.
د ۱۴۰۵ مالي کال تشکیل، په اداري او اجرائیوي چارو کې چټکتیا او په ټاکلي وخت د کار کوونکو دندې ته حاضري، هغه موارد وو، چې په دغه رهبري ناسته کې پر خبرې وشوې.
د کور او ښار جوړولو وزارت، د کار کوونکو د کاري وړتیا لوړولو برخه کې د دغه وزارت د محترم مالي او اداري مرستیال مولوي محمد رباني ناصح په مشرۍ یو هیئت وګمارل شو، چې پر بېلا بېلو حل لارو به غور کوي.
د کور او ښار جوړولو وزارت، د اسلامي شریعت په رڼا او د ملي ګټو خوندیتوب پر بنسټ د ولس خدمت کولو ته لستوڼي رانغښتي او په دغه برخه کې کلک هوډ لري.
