له بهرنیو پانګوالو سره د نوي کابل ښار د پراختیا په اړه لومړنۍ غونډه ترسره شوه
۱۴۴۷/۹/۱۳
د کور او ښار جوړولو وزارت، د نوي کابل ښار د پراختیا او اقتصادي زونونو په اړه له یو شمېر بهرنیو پانګوالو سره مهمه او تعارفي غونډه ترسره کړه.
غونډه د نوي کابل ښار د پراختیا ریاست، د پانګونې چارو د تنظیم ریاست او د اقتصادي زونونو د پراختیا ریاست له لوري د روسیې هېواد له پانګوال او د کنسرسیوم رئیس، د ازبکستان هېواد پانګوال او د میر ګروپ د شرکتونو رئیس او د سویلي کوریا هېواد پانګه وال او انجنیر سره ترسره شوه.
په دې ناسته کې، دواړو لورو د نوي کابل ښار د پراختیا په برخه کې د پانګونې پر شته فرصتونو او اړتیاوو هر اړخیز بحثونه وکړل.
دا ناسته لومړنۍ او تعارفي وه او تصمیم ونیول شو چې په راتلونکو ناستو کې به دواړه لوري د کور او ښار جوړولو وزارت تر چتر لاندې د نوي کابل ښار او نورو اړوندو پروژو په بېلابېلو برخو کې د فعالیتونو او پانګونې په اړه بشپړ او تخنیکي پرزنټېشنونه وړاندې کړي، تر څو د راتلونکو ګډو پلانونو لپاره لازم بنسټونه برابر شي.
د نوي کابل ښار ستره پروژه کولی شي د هېواد په اقتصادي وده، د کاري فرصتونو په رامنځته کېدو او د ښاري زیربناوو په معیاري پراختیا کې مهم رول ولوبوي.
د کور او ښار جوړولو وزارت رهبري ډاډ څرګندوي چې د پانګوالو لپاره به د همغږۍ، شفافیت او اسانتیاوو برابرولو په برخه کې لازم اقدامات ترسره شي، څو د ملي پرمختیا په بهیر کې اغېزمن او پایدار ګامونه واخیستل شي.
