سرپُل ولایت کې د ښاري سرغړونو مخنیوي په موخه لومړۍ ناحیه کې څارنه وشوه
۱۴۴۷/۰۱/۰۲
د کور او ښار جوړولو وزارت، له ښاري سرغړونو د مخنیوي ریاست محترم رئیس مولوي عبدالمنان حقاني وایي، اړوند مسلکي او تخنیکي ټیم یې د سرپُل ښار په لومړۍ ناحیه کې له خپلسریو د مخنیوي په پار څارنه وکړه.
ښاغلی مولوي حقاني وایي، په دغه څارنه کې، د یو حمام او یو ګدام ودانیزې چارې چې د پلان خلاف او په خپل سري ډول روانې وې، تشخیص او وځنډول شوې.
نوموړی وایي، د بهسازۍ پلان له مخې، یاد حمام په یوه استوګنیزه ساحه کې موقعیت لري، او ګدام چې ۷ متره په ۸ متره ابعاد لري، په نیمه پخه بڼه (له خټو او د ګاډرو وسپنو څخه) جوړېده، د سیند په حریم کې راځي.
د تېر په څېر، د یادو ودانیو مالکینو ته رسمي هدایت ورکړل شو، چې یادې چارې سمدستي ودروي او د ښاري اصولو او تصویب شوو پلانونو مطابق عمل وکړي.
د کور او ښار جوړولو وزارت ژمن دی، چې د ښار د تنظیم او ښاري اصولو د رعایت لپاره له استثناء پرته د ټولو غیر قانوني چارو مخنیوی وکړي.
