سرپل ولایت کې د خپلو سرو او غیرې قانوني هستوګنیزو ودانیو له جوړېدو مخنیوی وشو

۱۴۴۵/۱۰/۱۸
د کور او ښار جوړولو وزارت هېچا ته اجازه نه ورکوي چې په خپل سر او غیر قانوني توګه په ښاري پراختیا او ودانیزو چارو لاس پورې کړې.
سرپل ولایت کې د کور او ښار جوړولو ریاست محترم رئیس ملا محمد نور نورزاد وایي، هېچا ته به د خپلو سرو او غیرې قانوني ودانیو د جوړولو اجازه ورنه کړي.
ښاغلی مولوي نورزاد وایي، د ریاست اړوند تخنیکي ټيم یې په دغه ولایت کې د یو شمېر خپل سرو او غیرې قانوني ودانیو له جوړېدو مخنیوی وکړ.
د نوموړي په خبره، سرپل ولایت کې یې د ګڼو هستوګنیزو ساختماني چارو څارنه کړې، او د هغو ودانیو چارې یې ځنډولې دي چې د کار جواز نه لري، ویزه (تائید) شوې نقشې نه لري او هغه چې نورې قانوني نېمګړتیاوې لري.
د کور او ښار جوړولو وزارت تخنیکي ټیمونه په مرکز او ولایتونو کې د ټولو هغو غیرې قانوني او خپل سرو ودانیو مخنیوی کوي، چې د کار جواز ونه لري، غیرپلاني ساحه کې وي او یا هم د ویزه شوې نقشې خلاف ساختماني چارې ترسره کوي.