زابل کې څلور سوه جریبه ځمکه توپوګرافي سروې شوه
۱۴۴۵/۱۰/۱۲
د کور او ښار جوړولو وزارت د هېواد په کچه له دولتي ځمکو څخه د سالمې او اغېزمنې ګټې پورته کولو په موخه بېلا بېل پروګرامونه لري.
زابل ولایت کې د کور او ښار جوړولو ریاست محترم رئیس ملا دادګل مسلم وایي، د دې ریاست تخنیکي ټیم د شاجوی ولسوالۍ د اداري کمپلکس ساحه توپوګرافي سروې کړه.
د ښاغلي ملا مسلم په خبره، د شاجوی ولسوالۍ د ستراتېژیک پلان اړوند ۴۰۰ څلور سوه جریبه دولتي ځمکه د دولتي تاسیساتو لپاره توپوګرافي سروې شوه.
دغه راز، په یاده سمه کې خپل سرو او غیرې قانوني ودانیو ته د ځمکې د پرېښودلو او تخلیې امر شوی.
توپوګرافي سروې د ښاري او ساختمانی پلان لپاره یوه بنسټیزه سروې ده، چې د ځمکې د سطحې فزیکی ځانګړتیاوې او د هغې افقي او عمودي واټن په اړه معلومات ټاکي.
د کور او ښار جوړولو وزارت په پام کې لري، چې د ولسوالیو په کچه د اداري پېچلو پلانونو تنظیم کولو سره د دفترونو د خپلسریو او غیر پلاني جوړولو مخنیوی وکړي.
