زابل کې د ښاري تخلفاتو د مخنیوي په موخه نظارت ترسره شو
۱۴۴۷/۰۱/۱۸
د کور او ښار جوړولو وزارت، له ۍاري تخلفاتو د مخنیوي ریاست محترم رئیس مولوي عبدالمنان حقاني وایي، د زابل ولایت د کور او ښار جوړولو ریاست د رئیس الحاج ملا داد ګل مسلم د هدایت پر بنسټ یې، د یاد ریاست اړوند تخنیکي ټیم د زابل مرکز – قلات ښار په څلورمه ناحیه کې څارنه وکړه.
ښاغلی مولوي حقاني وایي، یاده ناحیه کې یوه ودانیزه پروژه د پلي کېدا په حال کې ده او دوی ترې د پلان خوندیتوب په موخه څارنه وکړه.
د نوموړي په خبره، ساحه کې چې د یوه تعمیر ودانیزې چارې روانې وې، د ریاست استازو د تخنیکي ارزونې تر بشپړېدو پورې د ودانیزو چارو موقتي درولو پرېکړه وکړه.
ښاغلی حقاني زیاتوي، دا اقدام د دې لپاره ترسره شو، چې د یاد ریاست تخنیکي ټیم وکولای شي ساحه په هر اړخیزه توګه و ارزوي او ډاډ ترلاسه کړي، چې چارې د ښاري نقشې، تخنیکي معیارونو او قانوني اصولو سره سمې روانې دي.
له ښاري تخلفاتو د مخنیوي ریاست وایي، هڅه کوي چې په زابل ښار کې د خپلسرو ودانیو، غیر معیاري جوړښتونو، او ښاري تخلفاتو مخه ونیسي، تر څو ښار د انجینري اصولو، قانوني نقشو، او پراختیایي پلان له مخې منظم پرمختګ وکړي.
د ښار نظم، ښایست، او دوامداره پراختیا د مسؤلو ادارو د همکارۍ او د خلکو د قانون پالنې په مټ تأمینېدلی شي.
