د یتیمانو ښارګوټي د ودانیزو چارو د کیفیت د ارزونې او تخنیکي څارنې بهیرعملي شو
۱۴۴۸/۰۸/۱۵
د کور او ښار جوړولو وزارت د محترم مقام د لارښوونې پر بنسټ، د هلمند ولایت د کور او ښار جوړولو ریاست تخنیکي ټیم د یتیمانو ښارګوټي له روانو ودانیزو چارو څخه هر اړخیزه تخنیکي څارنه ترسره کړه.
یاد ښارګوټی چې د قطر هېواد د شاهي کورنۍ د خیریه بنسټ له لوري تمویلېږي، د همدې بنسټ په مالي او تخنیکي ملاتړ تطبیقېږي او موخه یې د یتیمانو لپاره د معیاري، خوندي او دوامدار استوګنیز چاپېریال رامنځته کول دي.
د ترسره شوې څارنې پر مهال، د ښارګوټي په بېلابېلو برخو کې د ودانیزو بنسټونو قالب بندي، پلسترکاري، خشتکاري، تهکاو، د استوګنیزو ودانیو رغنیزې چارې او د احاطوي دیوال ودانیز فعالیتونه په منظم او موازي ډول روان وو.
د کور او ښار جوړولو ریاست تخنیکي ټیم د دغو چارو تخنیکي ارزونه وکړه او د کیفیت د ښه والي، دوامدار جوړښت او تخنیکي معیارونو د پلي کېدو په موخه یې اړوند ساحوي انجنیر ته لازمې لارښوونې وکړې.
د یادونې وړ ده چې د کور او ښار جوړولو ریاست د معیاري ښاري پراختیا او دوامدارو ودانیزو پروژو د تضمین په موخه، د ټولو ساختماني چارو دوامداره تخنیکي څارنه کوي، څو پروژې د ملي او تخنیکي معیارونو له مخې په اغېزمن او اصولي ډول تطبیق شي.
