د کور او ښار جوړولو وزیر په کابل کې له یو شمېر قطریانو سره وکتل
۱۴۴۷/۶/۱۳
د کور او ښار جوړولو وزارت محترم وزیر الحاج مولوي نجیب الله حیات حقاني، په خپل کاري دفتر کې د قطر هېواد د الغرافة خیریه بنسټ له لوړپوړو مسؤلینو سره وکتل.
دواړو لوریو په دغه کتنه کې، پر یو شمېر مهمو ودانیزو موضوعاتو بحثونه وکړل او نظرونه یې تبادله کړل.
دغه راز، په دې کتنه کې د کابل ښار د پنځمې ناحیې اړوند خوشحال خان سیمه کې د قطري استوګنیزې پروژې د پرمختګ، ترسره شوو چارو او پاتې برخو په تړاو خبرې وکړې.
محترم وزیر د قطري پروژې د وضعیت او دغه راز د پروژې د ځینو برخو د ډیزاین د بشپړولو او کارونو د ګړندیتوب په اړه هر اړخیزې خبرې وکړې او د مقابل لوري د دوامداره همکاریو غوښتنه یې وکړه.
قطري پلاوي په افغانستان کې د خپلو خیریه او پرمختیایي فعالیتونو لنډ معلوماتي راپور هم وړاندې کړ او غبرګه یې کړه چې د کابل استوګنیزې پروژې سربېره، په فراه ولایت کې هم یوه نوې استوګنیزه پروژه روانه لري.
د یاد بنسټ مسؤلینو څرګنده کړه، چې په همدې ښارګوټي کې د یو روغتون ترڅنګ د دوه مسجدونو کار هم پیلوي.
په پای کې دواړو لورو د لا نږدې همکارۍ او د یادو پروژو د چټک پرمختګ هیله څرګنده کړه.
