د کور او ښار جوړولو وزیر په کابل کې د یو ستر بهرني شرکت له مسؤلینو سره وکتل
۱۴۴۶/۵/۱
د کور او ښار جوړولو وزارت محترم سرپرست وزیر الحاج شیخ حمدالله نعماني، په خپل کاري دفتر کې د ترکیې هېواد د داینیک شرکت له مشر ښاغلي عبدالله شورش یازیجي او د دغه شرکت له بل همکار ښاغلي مراد سوزکیسن سره وکتل.
په دغه لیدنه کې، کابل ښار کې پر اصلاح او بهسازۍ ، مسکن او نورو برخو خبرې وشوې.
ښاغلي عبدالله شورش یازیجي، د خپل شرکت تجربو او تیرو کارونو په تړاو د کور او ښار جوړولو وزیر ته معلومات ورکړل، او یادونه یې وکړه چې له دوی سره یو شمېر نور شرکتونه هم شته چې غواړي په کابل کې پانګونه وکړي.
دغه ترکي پانکوالو زیاته کړه، که کابل کې ورته زمینه برابره شي، د اسلامی امارت سره په ګډه به په هغو غیرې پلاني سیمو کې په نړیوال معیار برابر ښارګوټي جوړ کړي، چې ډیرې قیمتي سیمې یې نیولي دي او د کابل د ښار ښکلا یې زیانمنه کړې ده.
د کور او ښار جوړولو وزارت محترم سرپرست وزیر شیخ حمدالله نعماني، ترکي پانکوالو ته وویل، نور ترکي شرکتونه دې هم کابل ته راشي، ساحې دې له نږدې وګوري او د کور او ښار جوړولو وزارت به ورته زمینه برابره کړي.
تمه ده چې په نږدې راتلونکي کې به یو شمېر نور بهرني شرکتونه کابل ته راشي او د پانګونې لپاره به پر شرایطو او اصولو خبرې وشي.
