د کور او ښار جوړولو وزیر له امریکا راغلي هیئت سره وکتل
۱۴۴۶/۰۳/۲۳
د کور او ښار جوړولو وزارت محترم سرپرست وزیر الحاج شیخ حمدالله نعماني، په خپل کاري دفتر کې له امریکا راغلي هیئت سره وکتل او پر یو لړ موضوعاتو یې خبرې وکړې.
شیخ حمدالله نعماني راغلي هیئت ته د ښه راغلاست ترڅنګ، په افغانستان کې د شته امنیت، فرصتونو او پرمختګونو په تړاو خبرې وکړې او زیاته یې کړه چې افغانستان د سیال کېدو په درشل کې دی او په هره برخه کې د پام وړ پرمختګونه لري.
په راغلي هیئت کې د مشهور نړیوال سوک وهونکي محمد علي کلې مېرمن اغلې ډاکټر خلیله علي او بل همکار و، چې په کابل کې به له بېلا بېلو برخو لیدنه وکړي.
اغلې ډاکتر خلیله علي وویل، غواړي په کابل کې یو پرمختللی ورزشي سټډیوم جوړ کړي او دغه راز به هڅې وکړې چې په نورو ټولګټو برخو کې هم د افغانانو ملاتړ وکړي.
اغلې علي وویل، په افغانستان کې د یو پرمختللي ورزشي سټډیوم جوړول، د هغې د خاوند او مشهور نړیوال سوک وهونکي محمد علي کلې ستر ارمان و، چې په خبره یې دا غواړي د هغه ارمان پوره کړي.
نوموړې، د کور او ښار جوړولو وزارت له محترم سرپرست وزیر وغوښتل چې په کابل کې د ورزشي سټډیوم لپاره ورته ځمکه ځانګړې کړي، تر څو یې دا د یو منظم پلان له مخې ودان کړي.
ښاغلي شیخ حمدالله نعماني، د نوموړي له همکارۍ د مننې ترڅنګ یادونه وکړه، چې د یاد ورزشي سټډیوم سربېره دې یو مجهز او معیاري مسجد شریف هم جوړ کړي، چې مسلمانان په کې د الله ج عبادت وکړي.
نوموړي وویل، هڅه به وکړي چې په نوي کابل ښار او یا په اوسني کابل کې یو مناسب ځای پیدا او د یاد ورزشي سټډیوم د جوړولو لپاره ځانګړی کړي.
د ناستې په دوام، اغلې ډاکتر خلیله علي، له محترم الحاج شیخ حمدالله نعماني مننه وکړه، چې د چارو په اسانتیا کې یې د مرستې کولو ټټر وډباوه.
هغې زیاته کړه، بېرته امریکا ته د تګ په مهال به له افغانستان څخه ښې خاطرې، او د امن او مخ پر ودې افغانستان یو ښه انځور یوسي، هغه څه چې ډېرو ترې ځانونه بې خبره اچولي دي.
