د کور او ښار جوړولو وزارت په مشرۍ کمېټې ته د څه باندې اتیا زره کورنیو لیست وسپارل شو
۱۴۴۶/۰۷/۱۲
د کور او ښار جوړولو وزارت د محترم سرپرست وزیر الحاج شیخ حمدالله نعماني په مشرۍ بې وزله مهاجرینو ته د نمرو د وېش کمېټې ته د مهاجرینو د ستونزو د حل محترم کمېسیون له لوري د هغه بې وزله کورنیو لیست وسپارل شو، چې اړتیا ده د سرپناه په موخه ورته نمرې ورکړل شي.
د اسکان دایمي کمېټې محترم منشي انجنیر محمد فهیم ذکریا وایي، تر اوسه د کور او ښار جوړولو وزارت په مشرۍ کمېټې ته د اتیا زره (80000) بې وزله کورنیو لیست ورسپارل شوی، چې له مخې به یې یادو کورنیو ته په اړوندو ولایتونو کې نمرې ووېشل شي.
نوموړی وایي، په ځینو پخوانیو ښارګوټو کې هم ځینې سپینې نمرې شته، چې تعدیل ته اړتیا لري او د تعدیل د ترسره کېدو وروسته به ووېشل شي.
محترم ذکریا زیاتوي، پنځلس هغه پخواني ښارګوټي چې ځمکې یې پخوا تشخیص شوې وې، دوی یې تازه سروې بشپړه کړې او د تفصیلي پلانونو پر جوړولو یې کار روان دی، چې تر دې دمه یې د شپږ هغو چارې بشپړې شوي او پاتې نور تر کار لاندې دي.
د کور او ښار جوړولو وزارت هوډ لري چې په (34) ولایتونو کې د بې وزله کورنیو لپاره د استوګنیزو ښارګوټو د جوړولو په پار ځمکې تشخیص، سروې، تفصیلي پلان جوړ او بیا یې د ورسپارل شوي لیست له مخې ووېشي.
