د کور او ښار جوړولو وزارت هغه پروژې ډیزاینوي چې، خلکو د کار زمینې برابروي
۱۴۴۶/۱۰/۰۸
د کور او ښار جوړولو وزارت محترم سرپرست وزیر الحاج شیخ حمدالله نعماني وایي، وزارت یې د ترانسپورت محترم وزارت سره د چارو په غوره ترسراوي کې همکار دی.
ښاغلي شیخ حمدالله نعماني چې، د کابل په ختیځ کې د مسافر وړونکو موټرو د ترمینل په پرانست غونډه کې یې خبرې کولې وویل، داسې پروژې کولای شي خلکو ته د کار کولو زمینې برابرې کړي.
نوموړي په کور دننه د کار زمینې برابرولو په موخه یادونه وکړه چې، وزارت یې هڅه کوي داسې پروژې ډیزاین کړي او زمینه ورته برابره کړي چې، خلکو ته د کار کولو زمینه برابره کړي او منظمه ښاري وده او پراختیا ورسره رامنځته شي.
محترم نعماني زیاته کړه، ښاري ترانسپورتي ترمینلونه او نورې ورته پروژې کولای شي په کور دننه د کار کولو زمینې برابرې کړي او بهرنیو هېوادونو ته د ځوانانو له قاچاقي سفر مخنیوی وکړي.
هغه له هېوادوالو وغوښتل چې، په ځان کې د اسلام او هېواد مینه پیدا کړي او بیرون ته له تګ ډډه وکړي.
د کور او ښار جوړولو وزارت محترم سرپرست هېوادوالو ته په خطاب کې وویل، د هېواد د ابادۍ په برخه کې د پردیو په تمه مه کینئ او خپله لاس په کار شئ.
محترم شیخ حمدالله نعماني وویل، امارت له خلکو پیسې راټولوي او بېرته یې په خلکو مصرفوي چې په خبره یې دغه برخه کې د فساد مخنیوي هڅې هم کوي.
نوموړي د خپلو خبرو په دوام وویل، د شکر ځای دی، چې د امارت ټول مسؤلین اسلامي او ملي ګټو ته ژمن دي او پر همدې اساس ډیری ودانیزې پروژې پیل شوي چې یو شمېر یې بشپړې شوي هم دي.
