د کور او ښار جوړولو وزارت نږدې پنځه نیم سوه نوي کار کوونکي د ازادو سیالیو له لارې وګمارل
۱۴۴۵/۱۰/۲۳
د کور او ښار جوړولو وزارت تر دې دمه په تخصصي خالي بستونو کې د ازادو سیالیو له لارې نږدې پنځه نیم سوه کسان په دندو وګمارل.
د کور او ښار جوړولو وزارت د بشري سرچینو ریاست محترم رئیس مولوي محمد هارون صدیقي وایي په ۱۴۰۲ کال کې یې په اوو پړاونو کې د (۵۳۹) تخصصي خالي بستونو ازموینه اخیستې، چې بستونه د ټولنیزو رسنیو له لارې اعلان ته ورکړل شوي وو او له مخې یې وړ او اهل کسان استخدام شول.
د کور او ښار جوړولو وزارت په مرکز کابل او ولایتونو کې د اداري اصلاحاتو محترمې ادارې په همکارۍ او وړ کسانو ته د کار سپارلو په موخه په رڼا بڼه برېښنایي ازموینه واخیسته.
د کور او ښار جوړولو وزارت په روان ۱۴۰۳ کال کې هم هوډ لري چې تخصصي خالي بستونه د ازادو سیالیو له لارې وړ او اهل کسانو ته وسپاري، تر څو خلکو ته د کار کولو زمینه برابره شي او د چارو واګي د مستحق کسانو په واک کې شي.
