د کور او ښار جوړولو وزارت مسلکي ټیم ارزګان ولایت ته د مهاجرینو په ښارګوټي کې د خط اچولو او نمرو توپیر په موخه واستول شول
۱۴۴۷/۱۱/۵
د کور او ښار جوړولو وزارت محترم وزیر الحاج مولوي نجیب الله حیات حقاني، د ارزګان ولایت اړوند د مهاجرینو د ښارګوټي اصلاحي تفصیلي پلان تر ارزونې وروسته تائید او لاسلیک کړ.
ارزګان ولایت کې دغه اصلاحي تفصیلي پلان د 1826 جریبه ځمکې لپاره ډیزاین شوی دی، چې تر اصلاح وروسته یې ټولې نمرې پنځه بسوه یي شوې.
دا چاره د اسلامي امارت زعیم عالیقدر امیرالمؤمنین حفظه الله تعالی و رعاه د حکم سره سم
ترسره کېږي، چې هرې یوې راستنې شوې مهاجرې کورنۍ ته یوه یوه پنځه بسوه یي نمره ځمکه ورکول کېږي.
د ارزګان ولایت د مهاجرینو د ښارګوټي د اصلاحي پلان له منظورۍ سره سم د کور او ښار جوړولو وزارت مسلکي ټیم، دغه ولایت ته په یاد ښارګوټي کې د خط اچولو په موخه روان شول.
تللی هیئت به چارې په عملي توګه پیل کړي او په ښارګوټي کې به خط اچونه وکړي چې له دې وروسته به یې وېشنه هم چټکه شي.
د کور او ښار جوړولو وزارت هڅې کوي چې ژر تر ژره پلانونه جوړ یا اصلاح کړي، خط اچونه وکړي او پر راستنو شوو مهاجرو کورنیو یې د نمرو وېش ترسره کړي.
دغه چاره، درنو مهاجرو کورنیو ته د دایمي استوګنې په موخه ترسره کېږي، چې په خپل هېواد کې دایمي او باعزته ژوند ولري او پردیو ته له احتیاج وژغورل شي.
