د کور او ښار جوړولو وزارت متخصصینو د توپوګرافیکي سروې لپاره بې پیلوټه الوتکه و ازمایله
۱۴۴۷/۵/۱
د کور او ښار جوړولو وزارت د سروې اوجي، ای ایس ریاست متخصصینو د ساحو د توپوګرافیکي سروې لپاره د بې پیلوټه الوتکې (هوايي عکاسي) ازموینه ترسره کړه.
دغه ازموینه د کور او ښار جوړولو وزارت د محترم وزیر الحاج مولوي نجيبالله حیات حقاني د لارښوونې له مخې، د کابل نوي ښار په ساحه کې د دې وزارت د انجنیرانو او متخصصینو، دجي، ای، ایس محترم امر انجنیر یحیی محقق او مل ټیم له لوري، د کابل نوي ښار د پراختیا محترم رئیس مولوي محمد بلال محمدي، د ده سبز محترم ولسوال مولوي خان زمان نصرت، د ده سبز ولسوالۍ محترم امنیه قومندان حاجي لطیف، او د عمومي استخباراتو ریاست محترم استازي قاري اسدالله عابد په ګډون ترسره شوه.
محترم انجنیر یحیی محقق وویل، د هوایي عکاسي لپاره دا بې پیلوټه الوتکه د ځمکې د سروې لپاره بنسټیز اهمیت لري، څو د ښارونو او بنسټیزو پلانونو د جوړولو او تنظیم لپاره ترې ګټه واخیستل شي.
نوموړي وویل، د کور او ښار جوړولو وزارت به له دې وروسته د درېبُعدي هوايي عکاسي کامرو څخه د توپوګرافیکي سروې په برخو کې ګټه پورته کړي.
هغه زیاته کړه، د کور او ښار جوړولو وزارت د اسلامي امارت په چوکاټ کې لومړنۍ ښاري سکتوري اداره ده، چې د توپوګرافیکي سروې لپاره له دې ټکنالوژۍ ګټه پورته کوي.
په دې سره به د ښارونو طرحه کوونکي وکولای شي له زیاتو دقیقو او باوري انځورونو څخه په استفادې سره د ښارونو پلانونه طرح او تنظیم کړي.
نوموړي دا هم وویل، د کور او ښار جوړولو وزارت د هوایي عکاسۍ لپاره دوه ډوله بې پیلوټه الوتکې لري چې د ښارونو د پلانونو او نقشو د هوايي انځورونو د اخیستلو لپاره کار اسانه او چټکوي، چې په باور یې که د ځمکني کمرې په وسیله توپوګرافیکه سروې یوه میاشت وخت ونیسي، نو دا کار د ډرون په مټ په یوه ساعت کې ترسره کېدای شي.
یاده دې وي، چې دا ازموینه په بریالیتوب سره ترسره شوه او د کور او ښار جوړولو وزارت متخصصینو ټولې تخنیکي برخې تنظیم کړې، ډرون یې هوا ته پورته کړ او په څو دقیقو کې یې ازموینه بشپړه کړه.
