د کور او ښار جوړولو وزارت لپاره د ښاري چارو مرستیال او د ده وزارت لپاره درې نوي رئیسان معرفي شول
۱۴۴۴/۰۵/۰۶
د کور او ښار جوړولو وزارت محترم سرپرست وزیر شیخ حمدالله نعماني د یو لړ مراسمو په ترڅ کې، محترم شیخ مدار علي بامیاني د دغه وزار د ښاري چارو د مرستیال په توګه او محترم حارث اختر زاده د برنامو عمومي رئیس، محترم شمس الدین بارکزی د حقوقي چارو مشاور او محترم احمد نوید افندي د املاک او اسکان د رئیس په توګه د وزارت کارکوونکو ته وروپېژاندل.
د کور او ښار جوړولو وزارت د ښاري چارو مرستیال او درې سره نوي رئیسان د ا.ا.ا محترم رئیس الوزرا الحاج ملا محمد حسن اخوند د حکم پر اساس معرفي شول.
د کور او ښار جوړولو وزارت محترم سرپرست وزیر شیخ حمدالله نعماني، نوو ګمارل شوو کسانو ته د نوې دندې مبارکۍ ترڅنګ دوی په ورسپارل شوو دندو کې د بریا هیله وکړه او هغوی یې خپلو مسؤلیتونو ته متوجه کړل.
سرپرست وزیر، عزم، تصمیم، نیت او اخلاص د ورځنیو چارو د پرمخ بیولو لپاره مهم وګڼل او نوو ګمارل شوو اشخاصو ته یې له الله (ج) د خدمت کولو د توفیق ورکړې غوښتنه وکړه.
ورپسې د چارو ادارې محترم مرستیال مولوي عبدالسلام حقاني، په ښاري چارو کې د کور او ښار جوړولو وزارت د نوي مرستیال د تقرر په موخه د ریاسة الوزرا حکم ولوست او زیاته یې کړه، چې دنده امتیاز نه، بلکې ستر مسؤلیت دی چې باید په سمه توګه ترسره شي.
د معرفي غونډې په دوام، قومي مشر او د سمنګان ولایت د دره صوف بالا ولسوال محترم محمد نسیم خیبر شکن خبرې وکړې او د ا.ا.ا له مشرانو یې مننه وکړه، چې ملي یووالي ته کار کوي او هڅې یې پیل کړي، چې د حکومت په اډانه کې د هر قوم او سمت وړ اشخاصو ته ځای ورکړي.
دغه راز په یاده غونډه کې د اهل تشیع د عمومي ستونزو د حل کمېسیون مرستیال محترم محمد حسین شریفي وینا وکړه، چې په یوه نظام کې عدالت مهمه خبره ده او باید ټول مسؤلین دې برخې ته پاملرنه زیاته کړي.
ورپسې د کور او ښار جوړولو وزارت د ښاري چارو مرستیال شیخ مدار علي بامیاني ګډونوالو ته په وینا کې د ا.ا.ا له مشرتابه مننه وکړه، چې پر ده یې باور وکړ او دغه مسؤلیت یې ورته وسپاره، او ژمنه یې وکړه چې په بشپړ اخلاص او پوره امانت دارۍ به ورسپارل شوې دنده پر مخ وړي او ځان یوازې د یو قوم پورې نه محدود کوي، بلکې ځان د ټول ملت مأمور ګڼي.د غونډي په پای کې د کور او ښار جوړولو وزارت د دعوت او ارشاد محترم رئیس مفتي عبدالاحد حقاني، د دعائیې ترڅنګ د ښئ حکومتولۍ، امانتدارۍ، اخلاص او مسؤلیت په اړه هر اړخیزه وینا وکړه او ټول یې اخروي عواقبو ته متوجه کړل.
