د کور او ښار جوړولو وزارت سرپرست شیخ حمدالله نعماني د کابل پوهنتون په سمینار کې
۱۴۴۶/۰۸/۰۳
د کور او ښار جوړولو وزارت محترم سرپرست وزیر الحاج شیخ حمدالله نعماني د کابل پوهنتون په سمینار کې د شاوخوا پنځه ولایتونو محصلینو ته ارزښتناکه وینا وکړه.
داخلي اختلافونه، قومي تعصبات، بهرني یرغلونه، فقر او بېوزلي، د زده کړو کچې ټیټوالی، رهبري، فکري او کلتوري یرغل، د هویت بحران، د عامه همکاریو نشتون، د ځوانانو رول او داسې نور هغه موضوعات و چې، ښاغلي شیخ حمدالله نعماني پرې هر اړخیز وضاحت ورکړ.
پر دې سربېره، د نړۍ په کلي کې د نه اختراعاتو او نوښتونو په ډګر کې د افغانستان وروسته پاتې کېدلو لاملونه، د غلامۍ ډولونه او لاملونه، بیرونۍ لاسوهنې، ډیموکراسي او اسلام، جهاد او اسلامي ارزښتونه، ملي یووالی او د افغانستان اسلامي امارت اهداف، د افغانستان او افغانانو عروج او زوال، مذهبي اختلافات او نور مهم عنوانونه وو چې، بحثونه پرې وشول.
ښاغلی سرپرست وزیر وویل، اسلامي امارت د فکر او عقیدې پر اساس د ملي یوالي سمبول دی چې، له بدخشان تر کندهار او نورو ټولو ولایتونو کې د یو هدف لپاره یو غږ او یو امیر لري او ملي یووالی یې ساتلی دی.
ښاغلي شیخ حمدالله نعماني له محصلینو وغوښتل چې، له قومي، سمتي، مذهبي او نورو تعصبات کرکه وکړي او د اسلامي اخوت په لحاظ له اسلامي امارت سره د عامه همکاریو پر اساس لاس یو کړي.
دمعلوماتو له مخې، د بېلا بېلو پوهنتونونو محصلینو ته دغه سمینار د دولس ورځو لپاره په پام کې نیول شوی چې، هر اړخیزه روزنه به ورکړل شي.
