د کور او ښار جوړولو وزارت سرپرست د ابن سینا مؤسسې له استازي سره وکتل

۱۴۴۶/۰۲/۰۴
د کور او ښار جوړولو وزارت محترم سرپرست وزیر الحاج شیخ حمدالله نعماني د ابن سینا مؤسسې له محترم استازي میرویس پوپل او مل هیئت سره وکتل.
لومړی د ابن سینا مؤسسې استازي ښاغلي میرویس پوپل د خپلې مؤسسې د فعالیتونو په تړاو یادونه وکړه او بیا یې غوښتنه وکړه، چې تمه لري د کور او ښار جوړولو له وزارت سره یو هوکړه لیک لاسلیک کړي.
ښاغلي پوپل وویل، په پام کې لري چې افغانستان کې د سترو پروژو په تړاو په متحد عرب امارتو کې یو کنفرانس چمتو کړي چې د نورو پروژو ترڅنګ به د نوي کابل ښار په تړاو هم د پآنګونې د جلب او جذب په موخه تبلیغات وکړي.
نوموړي وویل، موخه یې دا ده چې څنګه کېدای شي د نوي کابل ښار پروژو لپاره د بهرنیو پانګوالو پاملرنه جلب کړي.
د کور او ښار جوړولو وزارت محترم سرپرست وزیر الحاج شیخ حمدالله نعماني؛ د ابن سینا مؤسسې دغسې هڅې وستایلې چې غواړي افغانستان کې د سترو پروژو او په ځانګړې توګه د نوي کابل ښار لپاره د بهرنیو پانګوالو پاملرنه جلب کړي.
ښاغلي شیخ حمدالله نعماني وویل، ترتیب شوی هوکړه لیک به لومړی د وزارت د پالیسۍ او پلان محترم ریاست له لوري په دققه توګه مطالعه شي او بیا به له هغې وروسته د امکان په صورت کې لاسلیک شي.
د کور او ښار جوړلوو وزارت هڅې پیل کړي چې د دخلي پانګوالو ترڅنګ بهرني پانګوال هم په نوي کابل ښار پروژه کې د پانګونې لپاره وهڅوي، چې ملاتړ یې هم کوي.