د کور او ښار جوړولو وزارت او پښتني بانک ترمنځ د عامه پروژو د تمویل په اړه خبرې وشوې
۱۴۴۷/۰۳/۲۴
د کور او ښار جوړولو وزارت محترم مالي او اداري مرستیال الحاج محمد ارسلاح خروټي، په خپل کاري دفتر کې، د پښتني بانک له محترم عمومي رئیس عبدالواحد رحیمي سره وکتل.
په دغه کتنه کې، دواړو لوریو د عامه پروژو د تمویل په اړه هر اړخیزې خبرې وکړې.
د ناستې په دوام، د پښتني بانک محترم عمومي رئیس د هغه مکانیزم په تړاو معلومات وړاندې کړل، چې د اسلامي امارت د ریاسة الوزرا د اقتصادي معاونیت محترم مقام لخوا ترتیب شوی دی او له مخې یې په هېواد کې عامه پروژې تمویلېږي.
د کور او ښار جوړولو وزارت محترم مالي او اداري مرستیال الحاج محمد ارسلاح خروټي وویل، وزارت یې یوازې په کابل ښار کې شاوخوا څلوېښت داسې ځایونه په نښه کړي او کار یې پرې روان کړی، چې یاد ځایونه د سوداګریزو مارکېټونو، استوګنیزو فعالیتونو، لوړ منزلونو، ښارګوټو او نورو پراختیايي پروژو لپاره په پام کې نیول شوي دي.
ښاغلي مرستیال وویل، هڅې یې دا دي چې د یادو ځایونو لپاره داسې منل شوې طرحې وړاندې شي، چې له مخې یې په دغه ساحو کې د ملي ګټو او اړتیاوو په چوکاټ کې پروژې پلي شي.
نوموړي تمه وښوده، چې که له پښتني بانک سره یوې هوکړې ته ورسېږي، له مخې به یې د ښارونو د ودې او پراختیا او د خلکو لپاره د استوګنې او سوداګرۍ ځایونو د اسانتیاوو په برابرولو کې اغېزمن ګامونه پورته شي.
د کور او ښار جوړولو وزارت، د هېواد په کچه د ښاري پراختیا او بنسټیزو پروژو د پلي کولو لپاره، له بېلا بېلو ادارو او مالي بنسټونو سره همکاري پراخوي.
