د کور او ښار جوړولو وزارت، راستنو شویو مهاجرو کورنیو ته تېره ورځ شنبه (١١٣٩) استوګنیزې نمرې ووېشلې
۱۴۴۷/۱۱/۳۰
د کور او ښار جوړولو وزارت په مشرۍ د دایمي مېشتېدنې او د ځمکو د وېش کمېټې، د روانې ثور میاشتې په ۲۶مه نېټه په اوو ولایتونو کې (١١٣٩) استوګنیزې نمرې ووېشلې.
د تیرې شنبې په ورځ په ننګرهار ولایت کې (۳۱۲) راستنو شویو مهاجرو کورنیو ته، اروزګان کې (۹۸) کورنیو ته، زابل کې (۱۵۰) کورنیو ته، لوګر کې (۲۴۶) کورنیو ته، میدان وردګو کې (۱۲۰) کورنیو ته، هلمند کې (۸۲) کورنیو ته او په غزني ولایت کې (۱۳۱) کورنیو ته استوګنیزې نمرې ووېشل شوې.
د کور او ښار جوړولو وزارت محترم وزیر الحاج مولوي نجیب الله حیات حقاني، وایي، دا چاره یې ځکه ګړندۍ کړې، څو راستنو شویو مهاجرو کورنیو ته د دایمي مېشتېدو لپاره مناسب فرصتونه برابر شي.
ښاغلی وزیر مولوي نجیب الله حیات حقاني وایي، د یاد پروګرام موخه د راستنو شویو کورنیو د اساسي اړتیاوو پوره کول، د منظمې ښاري پراختیا رامنځته کول او د ژوند د ښه چاپېریال برابرول دي.
دا یوازې هغه شمېرې دې چې تېره ورځ شنبه (۱۱۳۹) نمرې وېشل شوې دي، اما په ټوله کې تر دې دمه (٢٧٢٧٧) استوګنیزې نمرې وېشل شوي او دا لړۍ په چټکۍ سره روانه ده.
د ځمکو وېش به د منظور شوو طرزالعملونو او شفافو معیارونو له مخې دوام ومومي، څو راستنېدونکو مهاجرو کورنیو ته په عادلانه ډول د استوګنې زمینه برابره شي.
