د کور او ښار جوړولو وزیر د ساختماني شرکتونو له مسؤلینو سره وکتل
۱۴۴۵/۱۱/۲۶
د کور او ښار جوړولو وزارت محترم سرپرست وزر شیخ حمدالله نعماني او د دغه وزارت د مسکن، ودانیزو چارو او د زونونو د پراختیا محترم مرستیال مولوي روح الله احمدي، د ساختماني شرکتونو له مسؤلینو او استازو سره وکتل او د تأمیناتو، تضمیناتو او مقروضیتونو د ورکړې او دغه راز د نیمه کاره پاتې پروژو د برخلیک معلومولو په اړه یې خبرې وکړې.
د ساختماني شرکتونو مسؤلینو او استازو غوښتنه وکړه چې تأمینات، تضمینات او مقروضیتونه دې ورکړل شي او د نیمه کاره پروژو برخلیک دې معلوم شي.
په ناسته کې، د کور او ښار جوړولو وزارت محترم سرپرست وزیر شیخ حمدالله نعماني وویل، د دغه وزارت په پروژو کې د شامل ساختماني شرکتونو په ستونزو خبر دی او هڅې یې روانې کړي چې ژر تر ژره ستونزې حل شي.
ښاغلي شیخ حمدالله نعماني وویل، د ساختماني شرکتونو د ستونزو د حل په موخه یې ځانګړې کمېټه ګمارلې، د ټولو پروژو معلومات یې بشپړ کړي او په لنډ وخت کې به یو ټاکلی هیئت ولایتونو ته واستوي، تر څو له پروژو څخه حضوري راپور ترتیب او له مقام سره شریک کړي.
نوموړي تمه وښوده چې دغه چاره به په لنډ وخت کې سرته ورسېږي او تمه لري چې سږ کال به د تأمیناتو، تضمیناتو، مقروضیتونو او د نیمه کاره پروژو د برخلیک برخه کې شته ستونزه تر یو بریده هواره کړي.
ښاغلي نعماني د خپلو خبرو په دوام وویل، د ساختماني شرکتونو غږ یې د ستونزو د حل په موخه د مالیې محترم وزارت سربېره تر ریاسة الوزرا او د امیرالمؤمنین حفظه الله تر دفتره رسولی او راغلو کسانو ته یې ډاډ ورکړ چې اسلامي امارت به د امکاناتو په صورت کې د ساختماني شرکتونو ستونزې ور حل کړي.
