د کندز ښار په شنه ساحه کې د غیرقانوني ودانۍ مخنیوی وشو
۱۴۴۷/۰۳/۰۸
د کور او ښار جوړولو وزارت د ښاري سرغړونو د مخنیوي ریاست محترم رئیس مولوي عبدالمنان حقاني وایي، چې د دې ریاست اړوند تخنیکي ټیم د کندز ولایت په یو شمېر ناحیو کې د څار او نظارت لړۍ ترسره کړه.
یاد څار په کندز کې د کور او ښار جوړولو د ریاست د محترم رئیس مولوي محمد رمضان کلیم، په لارښوونه ترسره شوه ، چې د څار پر مهال د خانآباد بندر د سینما ناشر څلور لارې ته څېرمه یو تجارتي مارکېټ په داسې حال کې د جوړېدو په حال کې وموندل شو چې په نقشه کې دغه ساحه د شنې ساحې په توګه مشخصه شوې وه.
ښاغلي مولوي حقاني وویل، د ښاري سرغړونو د مخنیوي ټیم د یادې ودانۍ کار ودراوه او مسؤلینو ته یې جدي سپارښتنه وکړه چې ټول کارونه باید د ښاري پلان، نافذه قوانینو او اړوندو لایحو سره سم پر مخ یوسي.
د ښاري سرغړونو د مخنیوي ریاست ټینګار کوي چې دا ټیم به تل هڅه کوي د ښاري سرغړونو مخه ونیسي، څو هېوادوال د یو منظم، پلاني او ښکلي ښار څښتنان شي.
