د کندز په کابل بندر کې د پلان خلاف ودانیو مخه ونیول شوه
۱۴۴۷/۸/۶
د کندز ولايت د کور او ښارجوړولو رياست د ښاري تخلفاتو ټيم د ياد ولايت د کابل بندر په سيمه کې د نظارت پر مهال دوه سوداګریز مارکېټونه وموندل چې د ښاري پلان خلاف په اساسي ډول د جوړېدو په حال کې وو. د معلوماتو له مخې، دغه سيمه د ښاري ماسټر پلان له مخې شنه ساحه ټاکل شوې ده.
د ښاري تخلفاتو ټيم د يادې سرغړونې د مخنيوي په موخه د دغو ودانیزو پروژو چارې ودرولې او اړوندو مسؤلينو ته يې جدي سپارښتنه وکړه چې خپل فعاليتونه ژر تر ژره د ښاري پلان او نافذه قوانينو په چوکاټ کې عيار کړي.
مسؤلين ټينګار کوي چې د ښاري پلان پلي کول، د شنو ساحو ساتنه او د ناقانونه ودانيو مخنيوی د ښار د منظم پرمختګ، چاپېريال ساتنې او د خلکو د هوسا ژوند لپاره مهم دي، او د دې برخې له قوانينو څخه سرغړونه به له قانوني چلند سره مخ شي.
د کندز ولايت د کور او ښارجوړولو رياست د ښاري تخلفاتو ټيم په دوامدار ډول د ښار بېلابېلې سيمې تر نظارت لاندې نيسي تر څو د ناقانونه ودانيو، د شنو ساحو د له منځه وړلو او د ښاري پلان د سرغړونو مخه ونيسي.
