د کارونو د لا ښه والي په موخه ناسته تر سره شوه
۱۴۴۶/۳/۱۹
د کور او ښار جوړولو وزارت د مالي او اداري محترم مرستیال الحاج محمد ارسلاح خروټي په مشرۍ د دې وزارت مالي او اداري رئیسانو او امرینو د کارونو د لا ښه والي په موخه ناسته وکړه.
په دې ناسته کې د اړوندو ریاستونو استازو د خپلو فعالیتونو، د شته ستونزو او ننګونو په اړه خبرې وکړې او د ستونزو د حل په موخه یې ځیني وړاندیزونه وکړل.
په دې ناسته کې یادونه وشوه چې د مالیې وزارت لخوا د کور او ښار جوړولو وزارت لپاره بودیجه ځانګړې شوې چې په دې سره به په ټول هېواد کې نیمګړو پروژو ته رسیدنه وشي.
د کور او ښار جوړولو وزارت مالي او اداري محترم مرستیال د مالي او اداري رئیسانو او امرینو څخه وغوښتل تر څو کارونه د خنډ او ځنډ پرته د قانون په چوکاټ کې تر سره کړي تر څو شته ستونزې حل او په کارونو کې چکټیا را شي.
ښاغلي خروټي د خبرو په دوام وویل د وزارت په ترانسپورټي برخه کې دې اسانتیاوې را منځته شي تر څو د وزارت ټولو کارونو ته په وخت رسیدنه وشي.
همداراز ښاغلي خروټي د ټولو رئیسانو څخه وغوښتل چې د خپلو کارکوونکو سره په مهربانۍ سره چلند وکړي او کارونه دې په همغږۍ او صداقت سره تر سره کړي.
