د کابل ښار د شبکو له چارو جدي څار پیل شو
۱۴۴۶/۰۶/۲۸
د کور او ښار جوړولو وزارت له ښاري تخلفاتو د مخنیوي ریاست محترم رئیس مولوي عبدالمنان حقاني وایي، کابل ښار کې یې د ښاري شبکو له چارو جدي څار پیل کړ، تر څو چارې معیاري او د پلان مطابق سرته ورسېږي.
ښاغلی مولوي حقاني وایي، تخنیکي او مسلکي انجنیران یې په کابل ښار کې له دهمزنګ تر کوټه سنګي د غځېدلي سړک له چارو د نظارت او څرنګوالي په موخه واستول.
نوموړی وایي، یاده چاره یې د درېیمې محترمې ناحیې په همغږۍ ترسره کړه او د جوړېدونکي سړک ارزونه او څارنه یې وکړه.
د کور او ښار جوړولو وزارت محترم مقام له لوري د دغه وزارت اړوند د ښاري تخلفاتو د مخنیوي ریاست مؤظف ګرځول شوی، تر څو په کابل کې د ښاري پلانونو او د سړکونو جامع پلان د تطبیق له څرنګوالي ډاډ ترلاسه کړي.
د دغه وزارت تخنیکي او مسلکي انجنیران د منل شوو ملي او نړیوالو معیارونو او ستنډردونو په پام کې نیولو سره د کابل ښار له جوړېدونکو سړکونو څارنه کوي، تر څو چارې د پلان مطابق سرته ورسېږي.
د کور او ښار جوړولو وزارت له دندو جوړېږي، چې له ټولو دولتي پروژو څارنه او ارزونه وکړي.
