د کابل ښار د خواجه رواش ښارګوټي له ښاري سرغړونو څخه تخنیکي څارنه ترسره شوه
۱۴۴۷/۰۸/۱۶
د کور او ښار جوړولو وزارت د ښاري سرغړونو د مخنیوي د عمومي ریاست د لارښوونې پر بنسټ، د یاد وزارت د ښاري تخلفاتو ته د رسېدنې او د پروژو د تطبیق د نظارت ریاست اړوند تخنیکي ټیمونو، د کابل ښار د پنځلسمې ناحیې د خواجه رواش ښارګوټي څخه د تفصیلي پلان له مخې تخنیکي څارنه او ارزونه ترسره کړه.
د ترسره شوې ارزونې پر مهال څرګنده شوه، چې په یاد ښارګوټي کې یو شمېر خپلسرې او ناقانونه کړنې ترسره شوې دي، چې د ښاري نظم، تفصیلي پلان او قانوني اصولو سره په ټکر کې دي.
په دغو سرغړونو کې د عامه لارو او سړکونو مسدودول، په شنو ساحو کې د دوکانونو او غرفو جوړول، په نامناسبو ځایونو کې د مخابراتي پایو نصب، له ټاکل شوو حدودو څخه د ودانیو د پوړونو زیاتوالی او ورته نور موارد شامل دي.
د یادو سرغړونو د مخنیوي په موخه، او له دې امله چې تر دې وړاندې هم سرغړوونکو ته خبرتیاوې ورکړل شوې وې، دا ځل هغوی ته وروستی مهلت ورکړل شو، تر څو یادې سیمې د تفصیلي پلان مطابق خپلو ټاکل شوو استفادو ته بېرته را وګرځوي او له هر ډول بې نظمۍ څخه مخنیوی وشي.
دا څارنه د ښاري سرغړونو د مخنیوي د عمومي ریاست د محترم رئیس د هدایت له مخې ترسره شوې او اړوند مسؤلین مکلف دي چې د سرغړونو د له منځه وړلو بهیر په جدي ډول تعقیب کړي.
